अनुसन्धानले काठमाडौंमा ५० लाख रुपैयाँभन्दा सस्तो मूल्यमा घर तथा अपार्टमेन्ट निर्माण गरे सहजै बिक्री हुने भनेको ।
काठमाडौं उपत्यकामा सञ्चालित ५० वटा हाउजिङ्ग प्रोजेक्टमध्ये २२ वटा र ६६ वटा अपार्टमेन्ट प्रोजेक्टमध्ये २२ वटामा यो अध्ययन गरिएको थियो ।
अपार्टमेन्टभन्दा हाउजिङ्गको बजारमा राम्रो रहेको अध्ययनले देखाएको छ । निर्माण भएकामध्ये ७६ प्रतिशत हाउजिङ्ग बिक्री देखिएको छ भने अपार्टमेन्ट ५१ प्रतिशत मात्र बिक्री भएको छ ।
निर्मितमध्ये ४३ प्रतिशत हाउजिङ्गको मूल्य ५० लाखदेखि १ करोडको बीचमा छ । २ करोडमाथिका हाउजिङ्ग ८ प्रतिशत मात्र छन् । त्यसैगरी, अपार्टमेन्टको हकमा ५० लाखभन्दा कमका ४६ प्रतिशत छन् भने २ करोडमाथिका ६ प्रतिशत मात्र छन् ।
डेपुटी गभर्नर महाप्रसाद अधिकारीले विगतमा बिनारिसर्च रियलस्टेटमा लगानी गरेका कारण राष्ट्र बैंकले हस्तक्षेप गर्नुपरेको बताउनुभयो । डेपुटी गभर्नर अधिकारीको टिप्पणी थियो, ‘महँगो मूल्यको प्रडक्ट वास्तवमा बिक्री गर्न कठिन पर्ने रहेछ भन्ने यो रिसर्चले पनि स्पष्ट पारेको छ ।’
जग्गा तथा आवास विकास संघका अध्यक्ष इच्छाराज तामाङले यो रिसर्चबाट हाउजिङ्गमा कुनै समस्या नदेखिएको र अपार्टमेन्टमा केही समस्या देखिएको हुनाले सबै पक्षले बाँकी रहेका अपार्टमेन्ट बिक्रीमा सहयोग गर्न आग्रह गर्नुभयो । ‘अहिले निर्माण भइसकेका अपार्टमेन्ट कसरी छिटो बिक्री गर्न सकिन्छ भनेर राष्ट्र बैंक, बैंक र सरकारले सहयोग गर्नुपर्यो’, उहाँको आग्रह थियो, ‘त्यसपछि बनाउने प्रोजेक्ट रिसर्चको सुझावअनुसार कम मूल्यका बनाइनेछ ।’
